Use the icon on pages to add to favourites.

See & Do

{{::favorite.region}}

{{::favorite.title}}

{{::favorite.excerpt}}

Editorials

{{::favorite.region}}

{{::favorite.title}}

{{::favorite.excerpt}}

Events

{{::favorite.region}}

{{::favorite.title}}

{{::favorite.excerpt}}

Stuðul til ferðavinnumenning

Í juli 2018 varð nýggj kunngerð um stuðul til ferðavinnumenning sett í gildi, ið gevur Visit Faroe Islands heimild at lata vinnuligum menningarátøkum innan ferðavinnuna fíggjarligan stuðul.

Stuðulsskipanin verður roynd í eitt tíðarskeið og eftirmett í 2019, tá vit hava fleiri royndir við skipanini.

Freistin at søkja um stuðul er 7. desember 2018.

Trýst her fyri at koma til umsóknarblað

 

Endamál við stuðlinum

Endamálið við stuðulsskipanini er at birta undir og stuðla vinnuligum átøkum innan ferðavinnuna ið stuðla menningini av eini ábyrgdarfullari og burðardyggari ferðavinnu kring alt landið. Stuðulin verður latin til at seta nýggj tilboð og átøk innan ferðavinnuna í verk. Tað ber ikki til at fáa stuðul til íløgur ella rakstur.

 

Hvør kann søkja um stuðul

Øll hava møguleikan at søkja um stuðul um niðanfyrinevndu treytir eru loknar, tað verði seg einstaklingar, fyritøkur ella felagsskapir.

Tað er umsøkjarin sjálvur, t.e. ein navngivin persónur, ið hevur ábyrgdina av verkætlanini og øllum samskiftinum, frágreiðingum/eftirmetingum og fíggjarligum viðurskiftum.

 

Treytir fyri at fáa stuðul:

  • Talan er um vinnuligt endamál innan ferðavinnuna ið er við til at menna og fjøltátta ferðavinnuna í Føroyum
  • Umsóknarblaðið skal vera nágreiniliga útfylt og øll neyðug fylgiskjøl skulu fylgja við umsóknini, áðrenn umsókn verður viðgjørd
  • Stuðul verður bert veittur verkætlanum ella pørtum av verkætlanum, ið ikki eru settar í gongd, tá søkt verður um stuðulin.
  • Stuðulin verður veittur eftir krónu-til-krónu meginregluni. Tað merkir, at ein fortreyt fyri at fáa stuðul er, at umsøkjarin hevur fingið í minsta lagi helvtina av samlaðu stuðulsjáttanini ella fíggingini frá øðrum pørtum (t.d. grunnum, fyritøkum, felagskapum ella einstaklingum). Til ber eisini at útvega helvtina av fíggingini sjálvstøðugt, t.d. við bankaláni.

 

Hvat kann stuðul verða latin til

Allar vinnuligar verkætlanir innan ferðavinnuna, kunnu sum útgangsstøði fáa stuðul.

Tað ber til at fáa “persónligan” stuðul til ráðgeving, skeiðsvirksemi v.m. sum partur av hugskots- og førleikamenningini.

Til ber at fáa stuðul til fysiskar hentleikar ella útgerð við teirri treyt, at teir eru “almenn ogn” og tøkir fyri øll at nýta. Til dømis kann tørvur vera á eini gøtu, beinkjum, eini atløgubryggju, einum útsýnisstaði ella kunnandi skeltum í samband við, at okkurt nýtt tilboð verður sett í verk.

Undir serligum umstøðum ber til at fáa stuðul til innanhýsis lønarútreiðslur, t.d. sum partur av íverksetanini av einum vinnuligum tilboði, tá umstøðurnar tala fyri tí.

 

Stuðulsupphædd

Sum útgangsstøði er onki ítøkiligt minsta- ella evstamark fyri, hvussu nógvur stuðul kann vera latin. Stuðulsupphæddirnar eru tó m.a. treytaðar av játtanini og raðfestingum hjá Visit Faroe Islands, hvussu nógvar umsóknir koma inn og um mett verður, at verkætlanirnar stuðla endamálinum við stuðulsskipanini.

 

Umsóknarmannagongd:

Umsókn skal sendast Visit Faroe Islands við at fylla út umsóknarblað ið er at finna á heimasíðuni hjá VFI saman við fylgiskjølum, ið lýsa verkætlanina. Vanliga skulu hesar upplýsingar vera til skjals:

  • Endamál
  • Neyv verkætlanarlýsing
  • Upplýsingar um umsøkjara
  • Upplýsingar um samstarvspartar (m.a. hvør annar stuðlar/fíggjar)
  • Tíðarætlan
  • Kostnaðar- og fíggjarætlan

Viðkomandi kann eisini vera at viðfesta neyvari virkisætlan, eina marknaðar- og søluætlan, verksetanarætlan, lýsing av uppgávu- og ábyrgdarbýtinum í verkætlanini v.m.. Tað veldst um slag av verkætlan.

 

Umsóknarfreist

Umsókn skal sendast Visit Faroe Islands í góðari tíð áðrenn tiltakið byrjar.
Í 2018 er umsóknarfreistin fríggjadag 7. desember.

 

Viðgerð av umsóknum

Visit Faroe Islands ger av um stuðul verður latin við støði í teimum umsóknum ið eru innkomnar. Tað eru bara tær umsóknir ið lúka áðurnevndu treytir fyri at fáa stuðul, ið verða viðgjørdar.

Uppfyllir umsøkjarin treytirnar fyri at fáa stuðul og allar neyðugu upplýsingarnar eru til skjals, kann stuðul verða útgoldin.

 

Treytir ísv. stuðulsútgjald

Um fortreytirnar fyri eini stuðulsjáttan broytast munandi, kann VFI gera av ikki at útgjalda játtaðan stuðul. Somuleiðis kann VFI krevja, at stuðul verður afturgoldin, um stuðulin er útgoldin undir skeivum fortreytum, t.d. um tað vísir seg, at tær upplýsingar, ið stuðulin er grundaður á, ikki vísa seg at vera rættar.

Studningurin er treytaður av, at umsøkjarin fylgir teimum ætlanum, ið vóru grundarlag undir stuðulsveitingini. Broytast fortreytirnar fyri verkætlanini ella um annað ger tað neyðugt at víkja frá upprunaligu ætlanunum, skal VFI hava fráboðan um hetta. Somuleiðis skal umsøkjarin senda VFI umsókn um broyting í verkætlanini og um møguliga broyting í játtanini.

Tað áliggur eisini umsøkjaranum ein skylda at kunna VFI um gongdina í verkætlanini, serliga tá tað snýr seg um um týðandi broytingar í verkætlanini ið t.d. kunnu ávirka útrokningina av stuðlinum og um broytingar í tíðarætlanini.

 

Útgjald

Sum útgangsstøði verður stuðulin veittur í einum, tá verkætlanin er liðug og tá VFI hevur fingið eina eftirmeting av verkætlanini saman við endaligum roknskapi fyri verkætlanina.

Í serligum førum ber til hjá VFI at rinda part av stuðlinum í einum ella fleiri umførum, áðrenn verkætlanin er liðug. Tað veldst um, hvat slag av verkætlan talan er um, hvussu stórt vavi er og hvørjir aðrir partar eru við til at fíggja verkætlanina.

Er stuðulin frá Visit Faroe Islands hægri enn 100.000 kr. er tað eitt krav, at grannskoðaður roknskapur verður latin, ísv. at stuðulin skal gjaldast og verkætlanin eftirmetast. Í serligum førum kann VFI gera av, at grannskoðaður roknskapur verður latin, hóast stuðulin er undir 100.000 kr. Grannskoðarin skal vátta, at uppgerðin samsvarar við játtanartreytirnar.

Verkætlanarroknskapir skulu vera uppsettir soleiðis, at sammeting við kostnaðarætlanina í umsóknini er møgulig. Útgjaldið verður roknað út frá metta kostnaðinum í umsóknini, tó ongantíð hægri, enn hvat veruligi kostnaðurin er.

Upplýsast skal, um útreiðslur eru tiknar við, sum ikki sóust av kostnaðarætlanini.

 

Trýst her fyri at koma til umsóknarblað