BÓKADAGAR 2024: Søgur fyri børn hvønn tíma

Setið tykkum væl til rættis og njótið søguna, sum verður kveikt til lívs í eini søguleikhúsframførslu.

Hvønn heila tíma frá kl. 10.00 til 16.00 á Bókadøgunum fer ein sjónleikari at lesa eina søgu hjá Bókaklubbanum upp í Klingruni. Á skránni eru bæði nýggjar myndabøkur og kendir klassikarar, m.a. Abbi og eg og abbi, Mín!, Hvalagongan, Bukkarnir Brúsi, Gruffalo og Lorkuleggur.

Søguleikhúsið á Bókadøgunum er upplestur fyri børn upp á ein heilt nýggjan máta. Søguleikhúsið sameinir sjónleik og bókmentir og ger upplestur til eina gandakenda uppliving. Tað er ein stuttligur, serligur og einfaldur máti at miðla søgur, sum fær børnini við í munnbornu søguna stuðlað av litríkum myndaørkum og flotta leikhúsinum.

Málbólkurin er børn undir skúlaaldur.

Bókadeild Føroya Lærarafelags hevur tikið stig til søguleikhúsið.