her er lætt at fara ein túr, og útsýnið er altíð stórfingið

Ferðin til Svínoy er uppliving í sær sjálvari – við stórslignum útsýni allan vegin. Tú kanst velja millum at fara við tyrlu ella taka gomlu postleiðina, sum Ritan røkir. Longu á leiðini fært tú eina kenslu av, at hetta er nakað heilt serligt.

Søgnir siga, at Svínoy einaferð fleyt í mjørkanum, inntil ein gomul kona úr Fugloy festi oynna í havbotnin – og har hevur hon ligið síðan.

Tá tú kemur fram, bíða fleiri góðir gongumøguleikar. Oyggin er rættiliga fløt, so tað er lætt at fara ein túr, og útsýnið er altíð stórfingið.

Gongutúrur til Skoragjógv
Túrurin byrjar við Dansistovuna og er lættur og vakur ganga – umleið 1 km hvønn vegin.
Á vegnum kanst tú steðga við:

Svínastein – steinin, har grísan steðgaði, tá Svínoy varð fest í botn.

Dvørgastein – har søgnin sigur, at dvørgar búgva. Risastórir steinar við grønum toppi liggja undir vegnum her.

Oyggjarshellið – har hin kendi Árant Úti í Bø skal hava stolið seyð.

Eisini verður sagt, at ein mjólkarkøtla, sum datt í havið við gjónna í Yvuri í Dal, seinni rak fram við Skoragjógv. Tað hevur ført til gitingar um, at gjógvin gongur sum ein lítill tunil undir alla oynna.

Leiðin er merkt, og tú fylgir henni til umleið 100 metrar áðrenn gjónna. At nærkast sjálvum munnanum er vandamikið, og tað er bert møguligt at koma heilt inn sjóvegis.