„Danska svarið upp á Coldplay – bara betri enn upprunin,“ skrivaði GAFFA

Dupultkonsert, har rokkur, folk og indie smelta saman

Fríggjakvøldið 9. oktober kl. 21.00 verður dupultkonsert í Listastovuni við danska bólkinum The Mukherjee Development og okkara egna Lyon.

The Mukherjee Development
Í einum heimi, ið er merktur av syndring og ótryggleika, skrivar The Mukherjee Development sangir um tað, sum knýtir okkum saman.

„Danska svarið upp á Coldplay – bara betri enn upprunin,“ skrivaði GAFFA í einum fimmstjørnað ummæli av einari konsert hjá bólkinum.

Oddamaðurin Oscar Mukherjee hevur danskar, amerikanskar og indiskar røtur og er uppvaksin í Kalifornia. Løgini nema við samleika, kærleika, vinalag og longsil og verða borin av einari rødd, sum er bæði sár og sterk.

Tónleikurin flytur seg millum poetiskt folk, drívandi gittarrokk og stórar, filmiskar hæddir. Hugsa um ráu styrkina hjá Neil Young, rúmdina hjá The War on Drugs og intima nærverið hjá Phoebe Bridgers – men við einum serstøkum norðurlendskum dámi.

Við fleiri enn 200 konsertum hevur The Mukherjee Development veruliga gjørt vart við seg á danska tónleikapallinum. Bólkurin hevur millum annað spælt á NorthSide, Tønder Festival og Smukfest, framført beinleiðis í Go’ Morgen Danmark og verið nógv spældur á DR P4, P5 og P6.

Á nýggjastu plátuni, Square Up on a Curve frá 2025, er meginparturin av sangunum skrivaður av bólkinum í felag. Tað hoyrist aftur í einari sterkari orku, har stórsligin britpoppløg og indie- og fólkatónleikur og reinur rokkur verða savnað í eitt felags ljóð.

The Mukherjee Development eru:
• Oscar Mukherjee – sang og gittar
• Jakob Holm – gittar
• Søren Bigum – gittar, pedal steel og ljómborð
• Henrik Poulsen – bass
• Søren Poulsen – trummur

Lyon
Við eyðkendu røddini og einari ráari og inniligari framførslu skapar Lyon Hansen sangir, sum draga íblástur úr bæði føroysku náttúruni og amerikanskum blues- og fólkatónleiki.

Í tónleikinum møtast tað stilla og viðkvæma og tað myrka og óslípaða. Sangirnir nema við kærleika, miss, longsil og allar tær kenslurnar, sum eru torførar at seta orð á. Úr hesum skapar Lyon sín egna tónleikaheim, har folk, blues, indie og rokkur renna saman.

Íblásturin røkkur frá Tom Waits og Leonard Cohen til Bob Dylan, Mississippi John Hurt, Doc Watson og Dave Van Ronk. Tónleikurin er tó heilt hansara egni – rótfestur í Føroyum og borin av einari rødd, sum bæði kann vera lágmælt og sterk.

Lyon hevur spælt á festivalum sum Iceland Airwaves, G! Festival og Nordklang Festival og hevur eisini fingið viðurkenning frá BBC Introducing.

Á konsertini í Listastovuni fer hann at spæla løg av útgávuni Skull-sized Kingdom, eldri fólkaløg og annað tilfar úr sínum sangskatti. Millum sangirnar verða Summar nætur, Leið 400 og Kom heim við mær heilt sikkurt eisini at hoyra.

Við sær hevur Lyon bassleikaran Karl Andrias Stórá. Saman fara teir á pall við einari einfaldari og nærverandi manning, har røddin, sangirnir og samspælið sleppa at standa fremst.

Lyon eru:
• Lyon Hansen – sang og gittar
• Karl Andrias Stórá – bassgittar